Облыс әкімі Серік Шәпкенов жауапты сала басшыларымен бірге Атырау қаласында «Жайлы мектеп» ұлттық жобасы аясында салынып жатқан мектептердің құрылыс барысымен танысты.
Атырау қаласы бойынша Береке, Сарыөзек, Жұлдыз-2, Жұлдыз-3, Ақсай және Водников ауылдарында жаңа білім ордаларының құрылысы жүргізілуде. Қазіргі уақытта әр нысанның жерін қазу және іргетасын құю жұмыстары аяқталып, монолитті қаңқасы тұрғызылып жатыр. Мектептердің құрылысы биыл аяқталып, келесі оқу жылында пайдалануға берілмек.
Аймақ басшысы мердігерлерге мектеп құрылысын өндірістік кестеге сай жүргізуді, жұмыстардың жүру барысын қатаң бақылауда ұстап, сапалы аяқтауды тапсырды.
– Мемлекет басшысы әр оқушының білім алып, жан-жақты дамуы үшін қолайлы жағдай жасау мақсатында осы ұлттық жобаны іске асырды. Бұл мектептердің де деңгейі жоғары, ішіне қойылатын әр жиһаз бен құралдар заманауи болуы тиіс. Білім ошақтары ауылда да, қалада да жаңа бірыңғай стандарт бойынша салынады. Осы мектептерді салу арқылы өңірдегі үш ауысымды және апатты мектептер жойылады. Сондықтан құрылыс сапалы жүріп, уақытылы аяқталуы тиіс, нысандардың құрылысы сапалы әрі уақытылы орындалуы керек, – деді С.Шәпкенов.
Жалпы, «Жайлы мектеп» ұлттық жобасы аясында өткен жылы тоғыз мектептің құрылысы басталды. Биыл тағы үш мектептің іргетасы қаланады. Нәтижесінде, 12 жаңа мектепте екі кезеңде 24 мың оқушы білім алады.
