Жергілікті тұрғындарға осындай тамаша сыйды тарту еткен жаңа жоба «Ахмадияр» ЖШС-нің базасында жүзеге асырылған. Кәсіпкер Әсел Төлеуқызының айтуынша, осы істі бастау үшін ол «Даму» кәсіпкерлікті дамыту қоры арқылы екінші деңгейлі «Центркредитбанк» мекемесінен несие алған. Сөйтіп, шағын су тазарту цехының жобасы бірнеше көрсеткіштер бойынша сараптамадан өткізілген. Ал, су тазарту қондырғысы (американдық үлгідегі) Қытай елінде дайындалған. Арнаулы мамандардың көмегімен орнатылған құрылғыдан түтікше арқылы су жіберіліп, бірнеше сатылы тазарту сүзгісінен өткізіледі.
Зауытта сағатына 1 тоннаға дейін су дайындалып, сыйымдылығы 18,9 литрлік ыдыстарға құйылады. Қазірде «Айдын» таза ауыз суының алғашқы легі базарлар мен сауда нүктелеріне жөнелтіліп, тұтынушылардан лайықты бағасын да алып үлгерген.
Дәулетқали АРУЕВ,
Индер ауданы.
