Қазақ онкология және радиология ғылыми-зерттеу институты Атырау облыстық онкология диспансеріне гуманитарлық көмек жіберді.
Мұның ішінде 3 үрмелі қайық, 5 құтқару жилеті, 5 резеңке комбинезон мен
бас киімге тағылатын 5 шамы бар.
ҚР штаттан тыс бас онкологы, ҚазОРҒЗИ АҚ басқармасының төрағасы Диляра Қайдарова Атырау облысындағы төтенше жағдайға байланысты алаңдаушылығын білдіріп, бұл құрал-жабдықтың қажеттілігін жеткізді. Гуманитарлық көмекті қабылдап алған диспансер директоры Эльмира Сапарова ғимарат Жайық өзенінің іргесінде тұрғандықтан сақтықта қорлық жоқ екенін атап айтты.
-Атырау облысына су тасқынына қарсы іс-шараларды жүргізуге аса қажет құтқару құралдары мен гуманитарлық көмекті жеткізіп, әрдайым байланыста отырған әріптестерімізге дән ризамыз. Қазір бірлесіп, қаламызды тасқын судан сақтауға әрқайсымыз белсене кірістік. Осы сәтте аталған керек-жарақтың қажеттілігі сөзсіз. Атырау облыстық онкология диспансерінің ұжымы атынан гуманитарлық көмекті жинақтауға атсалысқан барлық әріптеске шексіз құрметімізді білдіреміз, – дейді ол.
Айта кету керек, бүгінде онкологиялық ауруларды емдеу, хирургиялық және химиотерапиялық, радиологиялық қызмет көрсететін Атырау облыстық онкология диспансерінде 110 стационар, 30 күндізгі бөлім жұмыс істейді.
Мәлике МӘЛІК
