Мақаттықтар Индерде көкөніс өсіріп, ауыл тұрғындарының сұранысын қамтып отыр.
Аудан әкімі Берікқали Сәрсенғалиев мұнайлы өңірдің жер жағдайы құрғақ, ауыл шаруашылығына қолайсыздығын ескеріп, өткен жылы Индер ауданы әкімдігімен келісім жасап, тәжірибе алмасу мақсатында өндірісті аудан азаматтарының ауыл шаруашылығы өнімін шығаруға ынтасын оятар ұсыныс-жобаларын қолға алды.
Осыған орай халықты табиғи, сапалы өніммен қамтамасыз ету және қолжетімді баға тұрақтылығын қалыптастыру мақсатында көршілес Индер ауданының Жарсуат ауылынан 70 гектар жер телімін рәсімдеген болатын. Биыл ауданнан «Ақмарал» шаруа қожалығы құрылып, сол жердің 17 гектарына егін салды. Топырағын құнарландырып, жерін тыңайтқан аймақтың 10 гектарына қауын мен қарбыз, 4 гектарына қияр мен қызанақ, 3 гектарына картоп өсіріп, өнімін жинауда. Қазіргі таңда 10 адамды жұмыспен қамтып отырған қожалықта бақша дақылдарының бітік шығуы қуантуда.
Ауданда әр аптаның бейсенбісінде тұрақты ұйымдастырылып келетін ауыл шаруашылығы өнімдерінің жәрмеңкесінде енді «Мақаттық өнімдер» де орын алды.
Өткен аптада аудан орталығындағы жәрмеңкеге 8 тонна қарбыз, 2 тонна қауын тасымалданып, тұтынушылар сұранысын қамтыды.
Лена НҰРБАЕВА
