«Қызылқоға ауданында еріген қар суын сору бойынша апаттық-құтқару жұмыстары жүргізілуде», – деп хабарлайды облыстық төтенше жағдайлар департаментінің қоғаммен байланыс тобы.
Сала қызметкерлерінің айтуынша, кеше сағат 15:02-ден бастап бүгінгі күнге дейін Қызылқоға ауданы Миялы ауылының көшелерінен 1486 текше метр қар суын шығару жұмыстары жүргізілді. Тұрғын үйлерге қауіп жоқ. Жағдай қатаң бақылауда.
–Апаттық-құтқару жұмыстарына облыстық төтенше жағдайлар департаменті өрт сөндіру және авариялық-құтқару жұмыстары қызметінің №10 өрт сөндіру бөлімінен 6 қызметкер, 2 мотопомпа, жергілікті атқарушы органнан 2 қызметкер және 1 бірлік техника, 3 мотопомпа жұмылдырылды. Қазір су сору бойынша жұмыстары жалғасуда. Сонымен қатар, әкімдік пен құтқарушылардың күшімен аудан төңірегінде ағып жатқан «Ноғайты» және «Сағыз» өзендеріндегі су деңгейін бақылау үшін бақылау бекеттері ұйымдастырылды, – делінген баспасөз хабарламасында.
