Орынсыз әзілдер тойға жиналған қауымның көңілін көтеріп емес, керісінше, сол бұлбұлша сайрап тұрған асабаның өзін күлкі қылатынын сезе ме екен? Жауыр болған сөздерді қойыртпақтай бергенше, той өткізудың жаңа бір түрін, өзінше бір «жаңалығын» неге енгізбейді?
«Мен бәленшеден бұрын сөйлеуім керек еді, қай жерім кем, маған сөзді кейін бердіңіз» деп бұлқан-талқан болып, берген сыйды аспанға атып, мінез көрсетіп жатқанша, жас жұбайларға ақ тілегіңізді оңаша ғана әдеппен білдірсеңіз жетіп жатқан жоқ па?
Тойды өткізгенде тәрбиелік мәні бар, рухани өсіретін, салт-дәстүрімізді дәріптейтін қойылымдар, ойындар, әсем әндер мен күй, би сияқты өнер түрлерін көбірек кірістірген жөн. «Алқалы топтың» айтарын ықшамдап, бес-алты үлкен адам тілек айтса, ол да өзінше бір сәнді. Сағыздай созып, естелік айтып тұрып алу емес, ең бастысы, көңіл тазалығы, тілек ақтығы екендігін есте ұстаған абзал.
Мейрамгүл ӘДІЛ, студент.
