«Каспий құбыр консорциумы-Қ» компаниясы қайырымдылық мақсатта жаңажылдық мерекелік шаралар өткізіп, балаларға қуаныш сыйлауды жақсы жолға қойған.
Биыл да осы дәстүрден жаңылмаған компания аз қамтылған отбасылардың және ем алушы 400-ден астам балаға ерекше көңіл-күй сыйлады. Қызыл-жасыл шамдармен көмкерілген жасыл шыршаны айнала қоршаған балаларға Аяз ата мен Ақша қар сыйлықтар тарту етті.
Қайырымдылық бағдарламасы аясында консорциум басшылығы Махамбет ауданындағы облыстық қосалқы мектеп-интернатының тәрбиеленушілеріне, облыстық балалар ауруханасындағы балаларға, сондай-ақ Құрманғазы және Мақат аудандарындағы балалармен кездесті. Осы кездесулер барысында жетім және ата-анасының қамқорлығынсыз қалған, мүгедектігі бар балаларға жаңажылдық сыйлықтар табыс етті.
– Консорциум әлеуметтік жауапкершілікті сезінетіндіктен білім беру, денсаулық сақтау, мәдениет салалары бойынша белсенді түрде қайырымдылық шараларын ұйымдастырып келеді. Сондай-ақ халықтың осал топтарына әлеуметтік көмек көрсетеді. Дәстүр бойынша Жаңа жыл қарсаңында интернаттарға, балалар ауруханаларына барып, балаларға мерекелік көңіл-күй сыйлап, сыйлықтар береміз, – деді «Каспий құбыр консорциумы-Қ» АҚ Қазақстан Республикасы Үкіметімен байланыс жөніндегі өкілі Асқар Шманов.
Жаңа жылдық сыйлық ретінде балаларға күзгі және қысқы күртеше, етік, төсек-орын жиынтығы, спорттық костюм, кроссовка және планшет табысталды. Сонымен қатар, әр балаға сыйлық жинағымен бірге компания басшылығы атынан тәтті сыйлықтар мен ізгі тілектер жазылған құттықтау хат табысталды.
Жыл сайын компанияның қаржылай қолдауымен Атырау облысында жергілікті халықтың әл-ауқаты мен өмір сүру сапасын арттыруға бағытталған қайырымдылық жобалары жүзеге асырылады. Атап айтқанда, мектеп, балабақша салуға және емдеу мекемелеріне заманауи медициналық құрал-жабдықтарды сатып алуға күш салып келеді.
Жаңажылдық мерекелік шаралар еліміздің барлық аймағында компания өкілдерінің қатысуымен ұйымдастырылды.
Алмас ҚАБДОЛОВ
