Бұдан бұрын Атырау облысындағы су тасқыны жағдайына байланысты «Күшіміз – бірлікте» акциясының негізінде ашылған арнайы пункт Жастар ресурстық орталығында болған еді. Бүгіннен бастап аталған пункт Атырау қаласы, Әбілхайыр хан даңғылы, 79 («Салтанат сарайы» жанындағы көрме залы) мекен-жайына ауысты.
Жастар ресурстық орталығының басшысы Мансия Сағидоллаеваның айтуынша, тасқын судан зардап шеккен ауылдарға азық-түлік, дәрі-дәрмек, гигиеналық құралдар жиналып жатыр.
-Сондай-ақ бөгет жұмысына көмектесіп жүрген еріктілерге күрек, топырақ салатын қапшық, қолғаптар керек. «Жұмыла көтерген жүк жеңіл» демекші, керек-жарақтарды қабылдау қызметі жалғаса береді, – деді орталық басшысы.
Майра ОРАЗҒАЛИЕВА
