Атырау облысында мемлекеттік-жекешелік әріптестік шеңберінде тағы екі көшені жарықтандыру жобасы іске асырылады.
Көшені жарықтандыру желілерін салу биыл басталып, келесі жылдың соңына дейін жалғасады. Бұл туралы ӨКҚ өткен брифингте Атырау облысының энергетика және тұрғын үй-коммуналдық шаруашылық басқармасының басшысы Мұрат Иғалиев мәлімдеді, деп хабарлайды өңірлік коммуникациялар қызметі.
Спикер өз баяндамасында 2017 жылдан бастап «Атырау қаласындағы көше жарығы желілерінің құрылысын салу және пайдалану» жобасы мемлекеттік-жекешелік әріптестік аясында іске асырылатынын атап өтті.
– Жобаны «БатысТранзит» АҚ жүзеге асырады. Олардың табысты серіктестікте тәжірибесі бар. Өткен жылы мекеме 19 көшеде жарық диодты шамдар орнатса, биыл тағы 20 көшені жарықтандырды. Мемлекеттік-жекешелік әріптестік бойынша екі қосымша жоба аясында қаланың 192 көшесін жарықтандыру жұмысы жоспарлануда. Сонымен қатар, Атырау-Индер, Атырау-Доссор тас жолдары жарықтандырылады, – деп мәлімдеді энергетика және тұрғын үй-коммуналдық шаруашылық басқармасының басшысы Мұрат Иғалиев.
