– Мемлекет басшысының Жолдауында Қазақстан 2017 жылы қолданыстағы қосымша құн салығынан бас тартып, салықтың тек үш түрімен жұмыс істейтіндігін атап көрсетті. Олар – бәрімізге белгілі ортақ салық. Екіншісі – жеке кәсіпкерлерге арналған салық. Үшіншісі – шағын және орта кәсіпкерлік пен аграрлық секторға арналған арнайы салық. Елбасымыздың атап өтуінше, бұлар көлеңкелі экономикамен күресуде барынша тиімді болмақ. Жолдауда айтылған тағы бір айрықша жағдай – елімізде жаңа инвестициялық және әлеуметтік саясаттың жүзеге аса бастайтындығы. Әсіресе, жекелеген бағдарламаларға сәйкес ел өңірлерінде осы саясатты жүзеге асырудың нақты тетіктері көрсетілгені болашаққа үлкен сенім туғызады, – деген аталмыш филиал төрағасы Ермекқали Юсупов Жолдаудан туындайтын міндеттерге де тоқталды.
Мемлекет басшысы экономикаға инвестиция тарту мәселесін жүйелі жолға қою қажеттігін баса айтқан болатын. Осы орайда ойын ортаға салған облыстық мәслихат депутаты Серік Ерубаев мемлекеттік кәсіпорындарды жекешелендіру және бәсекелестікті өрістетуді де қолға алудың қажеттігін айтты. «Мемлекеттік кәсіпорындарды жекешелендіруге отандық және шетелдік инвесторларды тарту, «Астана» халықаралық қаржы орталығын құру – бүгінгі маңызды міндеттердің бірі» дейді Серік Сәрсенұлы.
Ал, Саяси кеңес мүшесі Бақтыгерей Жұбанов Елбасы Жолдауын жүзеге асыруға әрбір қазақстандық атсалысуы тиістігін, әр азамат еліміздің тәуелсіздігінің 25 жылдығы қарсаңында «Біріміз – бәріміз үшін, бәріміз – біріміз үшін» деген қағиданы ұстанып, белсене еңбек етуі қажеттігін айтты. Сондай-ақ, облыстық филиалының саяси жетекшісі Әбілхан Төлеуішов, Жастар қанатының өкілі Данияр Күмісбековтер ойларын ортаға салып, пікірлерімен бөлісті.
Рита ӨТЕУҒАЛИ.
