МАХАМБЕТТІҢ МАЗАРЫ БАР ҚАРОЙДА…

Енді, міне, елімізде жарияланған «Мәдени мұра» бағдарламасына сай республикалық маңызға ие қорықты жөндеуге арнайы қаржы бөлініп, табиғаттың ыстық-суығы, жел мен ызғарының өтінде тұрған ақ мәрмәр мазардың бірқатар жеріне қалпына келтіру жұмыстары жүргізіле бастады. Бұл жұмыстарды «Қазреставрация» РМК Батыс Қазақстан облысындағы филиалының мамандары жүргізіп жатыр. Біз осы жұмыстардың басы-қасында жүрген маман Сансызбай Сұлтановты сөзге тартып, атқарылар жұмыстардың көлемін анықтамақ болған едік.
— Біз Махамбет бабамыздың 210 жылдығы қарсаңында басталып отырған бұл қалпына келтіру жұмыстарын 20 сәуірден бері жүргізіп жатырмыз. Алдымен 600 шаршы метр аумақты алып жатқан мазардың маңы мен қоршауы ішіндегі төселген тастарды алып, сынғандарын ауыстырып, қиыршық топырақ төсеп, сегіз сантиметрдей көтереміз. Әйтпесе, салынғаннан бергі уақытта алаңның бірқатар жерінің тастары сынып, төмендеп кеткен екен. Сондай-ақ, Махамбет батырдың жанында болған 14 батырдың есімі жазылған белгілерді де маңғыстаулық әктастармен түгел ауыстыратын боламыз. Оған арнайы тапсырыс беріліп, бір маманымыз сол жаққа кетті. Қоршаудың іргелері де қайтадан бекітіліп, тегістеліп, сынған жерлері жалғанып, сырланатын болады. Сонымен қатар, ескі қауымның айналасындағы қоршау да ретке келтіріледі. Ал, мазардың іші-сыртындағы әр тұсындағы жарылған, бүлініп, сарғайған, түсіп қалған жерлері мұқият тексеріліп, жөнделеді, арнайы төзімді әкпен әрленеді. Оған арнайы осындай ерекше құрылыстарға арналған қоспаларды пайдаланатын боламыз. Жалпы, біз мазарды әуел бастағы қалпына келтіруді көздеп отырмыз. Мұндай ел жадында мәңгілікке қалған тұлғаның мазарын жөндеп, қалпына келтіру жұмыстарын атқару бізге тапсырылғанын өзімізге үлкен абырой санаймыз, — деді ол. Сонымен қатар, осы Жарсуат округіне қарасты қыстақ орындарында отырған Қ.Естаев пен С.Өтепқалиев сынды азаматтардың көмектеріне ризашылығын білдірді.
Ең бастысы, батыр-ақынның 210 жылдығы қарсаңында мазар мен оның айналасы тағы бір жаңарып, абаттандырылып, жасыл желегі Қаройдың маң даласына сән беретін орынға айналғаны керек бізге. Ерлік мекенінің еңсесі де биік тұрғанына не жетсін, шіркін!..

Сүйеу ХАЛЫҚОВ,
Қарой жайлауы,
Индер ауданы.