Atr.kz/18 қараша, 2019 жыл. «Атырау» спорт кешенінде көркем гимнастикадан облыстық «Каспий жұлдыздары» ашық чемпионаты өтті. Оған Қазақстанның түкпір-түкпірінен 400-ден астам жас спортшы қыздар қатысып, өнер көрсетті.
Құрал-саймандарын түсіріп алған, құлап қалған сәттер, реніш пен қуаныштың көз жастары да болды – әсіресе, ең кішкентайлар арасында. Әрине, көпшілік алдына шығудың өзі оңай емес, дегенмен де, олар толқыныстарын жеңіп шығып, көрермендерге өте әдемі әрі әсерлі көрініс сыйлады.
Сайыстың ашылу салтанатына облыстық көркем гимнастика федерациясының президенті Алия Байжанқызы, басқарма бас маманы Айман Меңдіғалиева және «Атырау» спорт кешенінің басшысы Саят Тәжіғұлов қатысты.
Ашық чемпионаттың төрешісі ретінде ҚР еңбегі сіңген жаттықтырушысы, КСРО спорт шебері Светлана Красникова арнайы шақырылған болатын. Білікті маман Атырау облысындағы осы спорт түрінің жоғары деңгейде дамып келе жатқанын атап өтті.
Айта кету керек биыл Атырау көркем гимнастикасы мектебіне 16 жыл толады. «Каспий жұлдыздары» турнирі де 16-шы мәрте ұйымдастырылып отыр. Сайыстар ертең де жалғасын табатын болады.
Дереккөз: «Atyrau Sport»
