Түзеу мекемесінің қоршауынан ішкі аймаққа ұялы телефон лақтырғандар жауапқа тартылды

Атырауда түзеу мекемесінің қоршауынан ішкі аймаққа ұялы телефон лақтырғандар жауапқа тартылды. Әкімшілік іс қалалық мамандандырылған әкімшілік сотында қаралды.

Құқық бұзған 2 жігіт 29 желтоқсан күні қолға түскен. Атырау қаласы УГ-157-9 мекемесінің №4-5 учаскесінің әскери бөлім қызметшілері негізгі қоршау арқылы ішкі аймаққа қара түсті «SamsungDuos» ұялы телефонын және 1 дана ақ түсті құлаққап лақтыруға тырысқан азаматтар Т. және К.-ны ұстаған.

Сотпен құқықбұзушы Т. Әкімшілік құқық бұзушылық туралы Кодекстің 481-бабының 1-бөлігімен кінәлі деп танылып, оған 10 айлық есептік көрсеткіш мөлшерінде айыппұл салынды. Сондай-ақ, құқық бұзушылықты жасау құралы болып табылған зат мемлекет кірісіне тәркіленді.

Екінші құқықбұзушы К.-ға қатысты әкімшілік іс құқық бұзушының қатысуынсыз сырттай өндіріс тәртібінде қаралып, оған 10 айлық есептік көрсеткіш мөлшерінде айыппұл тағайындалды.

Айқара Ғұмар