Ортақшылда отбасы құндылықтары дәріптелді
Махамбет ауданы, Ортақшыл ауылында Отбасы күніне орай «Отбасым да – тарихтың бір тамыры» атты үлгілі отбасылармен кездесу кеші өтті.
Іс-шараға ауылдың өнегелі жанұялары – Аманғали отбасы мен Дәулетовтер отбасы арнайы шақырылып, қатысушыларға өмірлік тәжірибелері мен тәрбиелік мәні зор әңгімелерін ортаға салды.
Тағылымды іс-шараның шымылдығын ауыл әкімі Алмас Ұзақбайұлы ашып, отбасы өкілдеріне алғыс хаттар мен сый-сияпаттар табыстады. Шара барысында ауылдың ақжаулықты аналары өнегелі отбасыларға баталарын беріп, ақ тілектерін жеткізді. Сондай-ақ, ауылдың келіндері қонақкәде ретінде өз өнерлерін көрсетіп, салтанатты кештің шырайын аша түсті.
Қосарал орта мектебінің тәрбие ісі жөніндегі орынбасары Нұргүл Бақтыгерейқызы Отбасы күніне арналған тәрбиелік тренинг өткізсе, мәдениет үйінің басшысы Бексұлтан Маратұлы жүрекжарды тілегін білдіріп, поэзиядан үзінді оқыды.
Кештің соңында жас өнерпаз Аңсар Төлешова әсерлі ән шырқап, кітапханашы Әлия Өтепқызы дайындаған тақырыптық кітап көрмесі таныстырылды.
Іс-шара ауыл халқының бірлігін, отбасы құндылықтарын дәріптеген мазмұнды әрі тағылымды кеш ретінде есте қалды.
Алмас ҚАБДОЛ
