Шешімін күткен мәселе көп
Өңірлік коммуникациялар қызметінде өткен кезекті брифингке облыстық қоғамдық денсаулық сақтау департаментінің басшысы Өмірзақ Зинуллин келді.
Эпидемиологиялық ахуал бірқалыпты
Эпидемиологиялық ахуалға тоқталсақ, өткен жартыжылдықта 2016 жылдың сәйкесті кезеңімен салыстырғанда, облыста жұқпалы аурулардың бес түрінен аурушаңдық деңгейі төмендеп, 5-еуінен жоғарылаған. 2016-2019 жылдарға арналған «Денсаулық» мемлекеттік бағдарламасын жүзеге асыруға бағытталған іс-шаралар жоспарына сәйкес, биыл инфекциялық және паразитарлық аурулармен аурушылықтың жалпы көрсеткішін 100 мың адамға шаққанда 315,9-дан асырмау көзделген. Нақтысында, ол 185,5-ті құраған.
Туберкулез көрсеткіші көтеріліп тұр
Осы кезеңде жіті ішек ауруларының деңгейі өткен жылғыдан 20,4 пайызға жоғарылаған. Осылайша, тіркелген 200-ге жуық ауру дерегінің 98,9 пайызы 14 жасқа дейінгі балалардың үлесіне тисе, екі жасқа дейінгі сәбилердің үлес салмағы 95 пайызға тұрақтаған. Нәтижесінде, әрбір 100 мың адамға шаққандағы аурушылық көрсеткіші 32,7-ден айналып, республикалық орташа деңгейден (29,1) асып кеткен. Сол сияқты, туберкулезбен аурушылық бойынша да өсім барлығы байқалады. Тұтастай алғанда, туберкулездың белсенді түрімен есепте тұрғандардың саны 1065-ті құрап, өткен жылғы деңгейден 14,6 пайызға азайған. Облыста 259 бала туберкулезге қарсы екпе алмаған болса, олардың дені, яғни 203-і Атырау қаласында, сондай-ақ, Жылыой мен Құрманғазы аудандарында тіркелген.
Су сағатпен беріледі
Департамент басшысының мәлімдеуінше, облыс тұрғындарының 97 пайызы тазартылған ауыз сумен қамтылған. Биылғы жылдың алғашқы алты айында 72 су тазарту қондырғысының 37-сі тексеріліп, 160 ауыз су сынамасы зертханалық бақылауға алынған. Қорытындысында, олардың 8,1 пайызының бактериологиялық және 19,3 пайызының химиялық көрсеткіштері бойынша гигиеналық нормативтерге сәйкес келмейтіндігі анықталған. Өзекті мәселенің бірі – әлі күнге дейін ауыз судың үзіліспен берілетіндігі. Мұндай жағдай Махамбет, Индер, Исатай, Құрманғазы және Жылыой аудандарында орын алып отыр.
Дәулетқали АРУЕВ
