Құлсарының кішкентай тұрғыны тазалықты сақтауда үлгі көрсетті

Бүгін Құлсары қаласының кішкентай тұрғыны – Азиза Қуандыққа Жылыой ауданы әкімінің орынбасары Гүлмира Айшуақова арнайы алғыс білдірді. Бұл марапат — жасөспірімнің қоршаған ортаға жанашырлық танытып, қоғамға пайдалы ісімен көзге түсуінің нәтижесі.

Аудан әкімдігінің баспасөз қызметінің хабарлауынша, Азиза “Таза Қазақстан” экологиялық акциясы аясында қаланың тазалығына белсенді атсалысып, айналасын күл-қоқыстан тазартуға анасына өз еркімен көмектесіп, кіріскен. Жас табиғат жанашырының бұл ісі көпшілікке, әсіресе ересектерге үлгі боларлық.

— Осындай табиғат пен туған жерге қамқор, жанашыр өскелең ұрпақ — біздің болашағымыздың жарқын кепілі. Қоғамға пайдалы істе жас та болса белсенділік танытып, үлкен жауапкершілік көрсете білген Азизаға алғысымыз шексіз, — деді Г. Айшуақова өз сөзінде.

Айта кетейік, “Таза Қазақстан” акциясы елімізде экологиялық мәдениетті арттыру және қоршаған ортаны таза ұстауға жұртшылықты жұмылдыру мақсатында ұйымдастырылып келеді.

Алтыншаш ҚҰРМАШЕВА