Қазақстандық фильм шетелдік кинопрокатқа шықты
Бішкекте «Келінжан» фильмінің жабық көрсетілімі өтті. Осылайша отандық агенттіктің тапсырысымен түсірілген фильм алғаш рет шетелдік кинопрокатқа шығып отыр, деп хабарлайды ҚазАқпарат.
«Хабардың» фильмі алғаш рет шетелдік кинопрокатқа шықты. Бауырлас елдің көрермендері үшін қырғыз тіліне аударылған фильмнің жабық көрсетіліміне Қырғыз кинематография департаментінің, жергілікті БАҚ-тың өкілдері мен блогерлер, сондай-ақ Қазақстанның Қырғызстандағы Елшілігі қызметкерлері мен «Хабар» Агенттігінің өкілдері қатысты.
«Бұл – агенттіктің өз өнімін алғаш рет басқа тілде дубляж жасап, шетелге шығаруы. «Келінжан» сериалын YouTube платформасында көп көрген, жақсы пікірілер жазып, қызығушылық танытқан қырғыз аудиториясы болғандықтан, толықметражды фильмді қырғыздардың ана тіліне аударып, сол елде көрсету туралы шешім қабылданған болатын. Серіктес компанияның мәліметіне сүйесек, «Келінжанның» көрсетілетіні туралы ақпаратты халық өте жақсы қабылдаған», — деді «Хабар» Агенттігі АҚ Басқарма Төрағасының орынбасары Данияр Меңілбеков.
