ПИК ұйымдастырған наурыз-думан

Атырау қаласындағы Б.Құлманов көшесінде орналасқан №107 үй тұрғындары да Наурыз мейрамын ерекше ықыласпен атап өтті. Осындағы «Газовик» пәтер иелері кооперативі (ПИК-КСК) мұны жыл сайынғы дәстүрге айналдырған.

Шараға қатысқан қаладағы №11, 5, 2 мектеп оқушылары мен ұстаздары концерттік бағдарлама қойды. Ал, өз кезегінде ПИК қызметкерлері жиналғандарға наурыз-көже, бауырсақ, «плов» және басқа да тағамдарды ұсынды.

Айта кетейік, аталған үйде 140 пәтер бар. Онда түрлі ұлт өкілдері көп жылдан бері тату-тәтті тұрып келеді. Мерекелік кештен ұмытылмастай әсер алған тұрғындар осындай игі істі ұтқыр ұйымдастыра білген ПИК төрағасы Александар Карташовқа зор алғыстарын білдірді.

Амандық АБДОЛ