Оқушылар экология тақырыбында бақ сынады

Атырау қалалық жастар ресурстық орталығында «Қазақстан экологиясын жақсартуға мен қандай үлес қосамын?» атты шығарма және эссе байқауының жеңімпаздарын марапаттау салтанаты өтті.

Облыстық табиғи ресурстар және табиғат пайдалануды реттеу басқармасы ұйымдастырған іс-шараға қатысқан Атырау қалалық мәслихатының депутаты Мейрамгүл Есниязова байқаудың мақсат-міндеттеріне тоқталып, додаға қатысқан мектеп оқушыларына алғыс білдірді.

– Байқаудың басты мақсаты – оқушыларға табиғат пен қоғам арасындағы қарым-қатынастың үйлесімді дамуы үшін экологиялық мәдениеттің ауадай қажет екендігін түсіндіру. Сондай-ақ осы конкурс арқылы оқушыларды ынталандырып, шығармашылық ізденістеріне қолдау көрсету, жас буынды табиғат жанашыры болуға тәрбиелеу, — деді М.Есниязова.

Қазылар алқасының мүшелері облыс мектептеріндегі білікті қазақ тілі мен әдебиеті пәні мұғалімдерінен жасақталды. Доданың тағы бір ерекшелігі – байқау Атырау және Құлсары қалаларының IX–XI сынып оқушыларына арналған.

Ұйымдастырушылардың айтуынша, байқауға барлығы 29 өтінім түскен. Оның ішінде 10-ы Құлсары қаласынан, 19-ы Атырау қаласынан жолданған. Жұмыстардың 17-сі мемлекеттік тілде, 2-і орыс тілінде қабылданған.

Қазылар алқасының іріктеу жұмыстарының нәтижесінде эссе байқауының қорытындысы бойынша жүлделі І орынды Құлсары қаласы, №23 орта мектептің оқушысы Айзада Боранбайқызы жеңіп алды.

ІІ орынды Атырау қаласы, Б.Қонаев атындағы “BINOM” мектеп-лицейінің оқушысы Әсия Сейітжанова мен Атырау қаласы, №41 Ә.Кекілбайұлы атындағы орта мектептің оқушысы Гүлхан Зейнетова иеленді.

ІІІ орынға Құлсары қаласы, №13 жалпы білім беретін мектептің оқушысы Сәулетжан Боранбай, Атырау қаласы, Талғайран негізгі мектебінің оқушысы Айару Марат және №21 Жамбыл атындағы орта мектептің оқушысы Арайлым Сырымғали лайық деп танылды.

Сонымен қатар оқушыларды байқауға дайындаған жетекшілерге аталған басқарма басшысы атынан Алғыс хаттар табысталды.

Алтыншаш НӘСІПҚАЛИҚЫЗЫ