Нұрлан Ноғаев ысырапшылдықтан арылуға шақыруда

Атыраулық дін қызметкерлері халықты аста-төктіктен арылуға, қаза дастархандарындағы ысырапшылдықтан тыйылуға шақыруда. Бұл бастаманы облыс әкімі Нұрлан Ноғаев та қолдап отыр. «Садақадағы молшылық расымен де қынжылтады. Осындай жиындарда мұны мойындасақ та, жеке өзімізге келген кезде «қарапайым дастарханнан бейшара болып көрінбеймін бе?» деген оймен аста-төктікке жол беріп жатамыз. Жерлеу рәсімі, марқұмның басын қарайтуда да зәулім сарайлар тұрғызуды бәсекеге айналдырып алдық. Мұндай астамшылық кімге керек?» деген облыс басшысы Нұрлан Ноғаев дініміз талап ететін қарапайымдылықты насихаттауға шақырды.

Айта кетелік, бүгін түске дейін болып өткен облыс әкімі жанындағы діни бірлестіктермен байланыс жөніндегі кеңес отырысында орталық «Иманғали» мешітінің бас имамы Батыржан Мансұров көп жағдайда сүйек шығарылмаған қаралы үй иелерінің уақыты мейрамхана мен қоңды мал іздеуге кететінін мәселе етіп көтеріп, ысырапшылдықтан арылып, Құран бағыштап, дұға оқуға көбірек көңіл бөлуге шақырған болатын.

Баян ЖАНҰЗАҚОВА.

Суреттерді түсірген: Ерлан АЛТЫБАЕВ.