Маса мазаны ала бастады

Атырауда масалар қазірдің өзінде жұртшылықтың мазасын ала бастады. Осыған байланысты тұрғындар редакцияға хабарласып, улау жұмыстарының қашан басталатындығы туралы сұраған еді.

Атырау қалалық тұрғын үй-коммуналдық шаруашылығы және тұрғын үй инспекциясы бөлімінің баспасөз хатшысы Әсия Көшкінбаеваның айтуынша, биыл Атырау қаласы екі аумаққа бөлініп, масаға қарсы профилактикалық дезинсекция жұмыстарын жүргізуге ашық электрондық конкурс жарияланған. Осылайша облыс орталығында улау жұмыстарын екі мердігер атқаратыны белгілі болып отыр.

– Шаһардың сол жағалауына жеңімпаз мердігер мекеме болып «AG Disinfection services» ЖШС (99,6 млн. теңге), оң жағалауына «Артс» ЖШС (93,9 млн. теңге) танылды. Масаға қарсы профилактикалық дезинсекция жұмыстары осы айда басталады, — деп түсіндірді Әсия Оспанқызы.

Соңғы жылдары осы жұмыстармен айналысып, тендерден жеңімпаз болып келген құрылым – «AG Disinfection Services» ЖШС директоры Нұрлыбек Ахмедияров қазір қаланың Еуропа бөлігін дезинсекциялауға әзір екендігін жеткізді. Ал қансорғышты улау үшін қандай дәрі-дәрмектер қолданылатыны әзірге коммерциялық құпия екенін атап айтты. 

Айбөпе САБЫРОВА