Ерекше қажеттілігі бар жандарды алып жүретін адамдар теміржол билеттерін жеңілдікпен сатып алады
Еліміздің көлік ведомствосы жолаушыларды теміржол көлігімен тасымалдау ережелеріне бірқатар өзгеріс енгізуді ұсынды. Жаңартылған нормалар ерекше қажеттілігі бар азаматтар мен оларды алып жүретін тұлғаларға арналған жеңілдіктерді кеңейтуді көздейді. Атап айтқанда, I және II топтағы мүгедектігі бар азаматтарды, сондай-ақ ерекше қажеттілігі бар балаларды алып жүретін жандардың жол жүру құнына 50% жеңілдік беру ұсынылып отыр.
Республика Көлік министрлігі баспасөз қызметінің хабарлауынша, енді ерекше қажеттілігі бар адамдардан пойызға міну кезінде медициналық мекемелерден алынатын анықтамалар мен құжаттарды көрсету талап етілмейді. Көлік ведомствасы бұл рәсім арқылы белгіленген талапты жеңілдетуді көздеп отыр. Енді қажетті ақпарат автоматты түрде арнайы деректер базасы арқылы тексеріледі. Бұл шаралар ерекше қажеттілігі бар азаматтардың құқығын қорғауға бағытталып отыр.
Аталған жаңашылдықтарды аталған министрлікке қарасты Теміржол және су көлігі комитетінің мамандары дайындады. Қазір бұл өзгерістер мақұлдау сатысында тұр. Ережелерді 2025 жылдың екінші жартысында күшіне енгізу жоспарланыпты.
Айта кетейік, бүгінде барлық топтағы мүгедектігі бар азаматтар үшін әлеуметтік маңызы бар бағыттарда жүретін пойыздарға 50% жеңілдік қарастырылған. Жолаушылардың ыңғайлы жүруін қамтамасыз ету мақсатында отандық «ЗИКСТО» зауытымен 157 жаңа жолаушылар вагонын жеткізу туралы келісім жасалды. Оның ішінде 14 вагон мүмкіндігі шектеулі азаматтарға бейімделген. Биыл 4 вагон пайдалануға берілді, тағы 10 вагон жыл соңына дейін іске қосылады деп жоспарланып отыр.
Сонымен қатар, 2025-2030 жылдар аралығында «Штадлер – Қазақстан» зауытымен жасалған келісім аясында елімізге тағы 557 жолаушылар вагоны жеткізіледі. Оның 35-і ерекше қажеттілігі бар жолаушыларға арналған арнайы купелермен жабдықталады.
–Уәкілетті орган мүмкіндігі шектеулі азаматтарға қызмет көрсету сапасын арттыру бағытында жүйелі жұмыс жүргізіп келеді. Теміржол құрамынан бөлек, вокзал инфрақұрылымын да бейімдеу жұмыстары қолға алынған. Биылғы теміржол вокзалдарын ауқымды жаңғырту аясында вокзалдар мен перрондарға пандустар орнатылады, арнайы көтергіш құрылғылар енгізіледі және тактильді бағыттаушы жолақтар салынады, — делінген баспасөз хабарламасында.
Алтыншаш НӘСІПҚАЛИҚЫЗЫ
