Атырауда қоғамдық көліктердің қатары  90 жаңа автобуспен толықты

Атырау қаласында Қазақстан Республикасы Конституция күні қарсаңында жолаушылар тасымалы қызметін жақсарту мақсатында Yutong маркалы автобустар пайдалануға берілді. Қыркүйек айында қала тұрғындары мен қонақтарына 48 жаңа автобус қызмет көрсете бастайды.

«KG Transport» ЖШС автопаркіне тиесілі бұл көліктер жаңа бағыттар бойынша қатынайды. 

№61. «Авангард ықшамауданы – Сарыөзек ықшамауданы»;

№64. «Жұмыскер ықшамауданы – Авангард ықшамауданы»;

№66. «Дина базары – Береке ауылы»;

№67. «K7 Family тұрғын үй кешені – Авангард ықшамауданы»;

№69. «Өндірістік аймақ, №1 бекет – Теміржол вокзалы»;

№70. «Көктем ықшамауданы – Мирас ықшамауданы – Теміржол вокзалы».

Жоспарға сәйкес жылдың соңына дейін қалған 42  жаңа автобус кезең-кезеңімен жолға шығады.

Жаңа қоғамдық көліктер Қарағанды облысындағы «QazTehna» зауытында шығарылған және «Евро-5» экологиялық стандартына сәйкес келеді. Көліктер сығылған табиғи газбен (CNG – метан газы) жұмыс істейді.

Әр автобустың жалпы сыйымдылығы — 60 жолаушы. Салқындатқыш және 6 бейнебақылау камерасымен жабдықталып, мүмкіндігі шектеулі жандарға арналған жиналмалы пандус орнатылған. 

Атырауда бүгінде алты тасымалдаушы мекеме қызмет атқарады. Қала ішінде 32 бағыт бойынша қозғалыс ұйымдастырылған. Күн сайын орта есеппен 235 автобус тұрғындарға қызмет көрсетеді.