Жарнама
Жаңалықтар

«AITU KAZROBODRONE 2.0»: Қазақстанда Халықаралық дрон-рейсинг байқауының іріктеу кезеңі басталды

Astana IT University «Қазақстан инжиниринг» R&D орталығы және «KazRobotics» Қазақстандық спорттық және білім беру робототехника федерациясымен бірлесіп, Caravan of Knowledge және «Drone.KZ» ЖШС-нің қолдауымен «AITU KazRoboDrone 2.0» халықаралық дрон-рейсинг байқауының іріктеу кезеңдерінің басталғанын хабарлайды.

img 2916
Screenshot

«AITU KazRoboDrone 2.0» халықаралық байқауы 10-12 сынып оқушылары, колледж және жоғары оқу орнының студенттері, сондай-ақ білім беру мекемелерінің оқытушылары арасында өтеді. Қатысушылар дронды басқару шеберлігін симуляторда көрсетіп, 1 000 000 теңге жүлде қоры үшін бақ сынайды.

Байқау мектеп оқушылары 16+ (Junior және Senior), студенттер (Junior және Senior), педагогтер санаттары бойынша өтеді.

2025 жылғы 3-26 сәуір аралығында Қазақстанның 13 өңірінде беспилотты ұшу аппараттарын басқару бойынша аймақтық іріктеу кезеңдері өтеді. Байқауға дрон технологиясына қызығушылық танытқан дарынды оқушылар, студенттер мен оқытушылар қатысады.

Кеше Атырау өңірінде алғашқы іріктеу кезеңі басталды. Алдымен Х.Досмұхамедов атындағы Атырау университетінде «БПЛА саласының Қазақстандағы жаңа бизнес секторы ретінде дамуы» тақырыбында шеберлік сыныбы өтті. Дәрісті PhD кандидаты, Astana IT University-дің аға лекторы Зарина Құтпанова өткізді.

img 2920
Screenshot

-Беспилотты ұшу аппараттары технологиясы бүгінде әлемде қарқынды дамып келеді және Қазақстан да бұл үрдістен қалыс қалмауы тиіс. Дрондар тек ойын-сауық немесе әуесқойлық мақсатта ғана емес, ауыл шаруашылығы, логистика, экология және қауіпсіздік салаларында да кеңінен қолданыла бастады.AITU KazRoboDrone 2.0 байқауы жастарға осы технологиямен жақынырақ танысып, дрондарды басқару дағдыларын шыңдауға мүмкіндік береді. Біз талантты оқушылар мен студенттердің дрон-рейсингке деген қызығушылығы артып келе жатқанын көріп отырмыз. Бұл болашақта Қазақстанда жаңа технологиялық стартаптардың пайда болуына серпін береді деп сенеміз. Осындай ауқымды жобалар арқылы біз жастарға тек жаңа білім беріп қана қоймай, оларды болашақ инновациялық экономиканың бір бөлігі болуға ынталандырамыз, — дейді Зарина Алмабекқызы.

Сондай-ақ Теңізшевройл компаниясының “Jas Up” жобасының менеджері Асқар Алдан байқаудың мақсаты мен міндеттерін түсіндіріп, инновация индустриясындағы бұл бағытқа атыраулық жастардың қызығушылығы жоғары екенін атап айтты.

Студенттер дрон технологиясының Қазақстандағы даму перспективалары, заңнамалық аспектілері, қазіргі жарыстар мен алдағы дрон-рейсинг іріктеу кезеңдері туралы өзекті ақпарат алды.

Теориялық бөлімнен кейін қатысушылар – студенттер, мектеп оқушылары және педагогтер – дрондардың жұмыс принциптерімен, жарыс түрлерімен танысып, «Казинжиниринг» компаниясының R&D орталығы маманының FPV-пилоттау көрсетілімін тамашалады. Әсіресе, жастар үшін дронды басқару дағдыларын тәжірибеде сынап көру ерекше қызықты болды.

Іс-шара Теңізшевройл компаниясының Әлеуметтік инвестициялар бағдарламасы аясында ұйымдастырылып, жастар арасында БПЛА технологиясын насихаттауға және олардың заманауи технологиялар туралы білімін кеңейтуге маңызды қадам болды.

img 2727

Бұл дәріс Қазақстанда өтетін KazRobodrone 2.0 дрон-рейсинг симуляторындағы іріктеу жарыстарының бір бөлігі. Аталғағн жарыстар Astana IT University ұйымдастыруымен және Казинжиниринг компаниясының қолдауымен жүзеге асырылуда.

Айта кету керек, өңірлік кезеңдердің жеңімпаздары өз аймақтарының намысын қорғап, 2025 жылғы 20 маусымда өтетін финалдық кезеңге жолдама алады. Финалға Қазақстанмен қатар Түркия, Қытай, Өзбекстан және Қырғызстаннан келген шетелдік қатысушылар да қатысады.

Алтыншаш ҚҰРМАШЕВА

Суреттерді түсірген автор

Related Articles

Добавить комментарий

Ваш адрес email не будет опубликован. Обязательные поля помечены *

Back to top button