Жаңаталап ауылында жаңа спорт кешені ашылды

Admin17.08.2025 15:42

Бүгін – Спорт күні. 2004 жылдан бері тамыз айының үшінші жексенбісі Қазақстанда дәстүрлі түрде аталып өтіп келеді. Осы айтулы мерекеге орай Жаңаталап ауылында жаңа спорт кешені салтанатты түрде ашылды.

Ашылу рәсімінде облыстық дене шынықтыру, спорт және туризм басқармасының міндетін атқарушы Нұрбол Сыдықов ауыл тұрғындарын құттықтап, бұл күнді тарихи оқиғаға балады. Оның айтуынша, өңірде спорт инфрақұрылымын дамыту бағытында ауқымды жұмыстар атқарылып жатыр. Бүгінде облыстағы 64 ауылдық елді мекеннің жартысына жуығы спорт нысандарымен қамтылған. Жалпы алғанда, аймақта спорт инфрақұрылымымен қамтамасыз ету деңгейі 62 пайызды құрайды, ал бұқаралық спортпен қамту көрсеткіші 45 пайызға жеткен. Жаңа нысан Теңізшевройл компаниясының демеушілігімен 1,6 миллиард теңгеге тұрғызылып, бір жарым жыл ішінде пайдалануға беріліп отыр. Басқарма басшысы компания басшылығына ризашылығын білдіріп, осындай қолдау жалғасын табарына сенім артты.

Салтанатты жиында сөз алған ТШО-ның Үкіметпен және қоғаммен байланыс жөніндегі бөлімінің өкілі Нұрлан Ерғалиев спорт кешенінің «Игілік» әлеуметтік-инфрақұрылымдық ерікті бағдарламасы аясында салынғанын атап өтті. Оның мәліметінше, компания облыстың әлеуметтік инфрақұрылымын дамытуға жүйелі түрде үлес қосып келеді. Бағдарлама аясында осыған дейін Жылыой ауданындағы Ақкиізтоғай, Шоқпартоғай, Жаңа Қаратон, Майкөмген ауылдарында спорт кешендері мен Құлсары қаласында 3 мың орындық орталық стадион салынған.

Жаңа спорт кешенінің лентасын ауыл ақсақалы Жағапар Қасиетов пен дзюдошы Әбиба Әбужақынова қиды. Қазақстан құрамасының мүшесі, 2025 жылғы әлем чемпионатының күміс жүлдегері, әлемдік және құрлықтық біріншіліктердің бірнеше дүркін жүлдегері болған спортшы жас буынға сәттілік тілеп, ауылға заманауи спорттық нысанның ашылуы үлкен қуаныш екенін жеткізді. Ол аймақта спорт кешендерінің жылдан-жылға көбеюі ел спортының болашағына жасалып жатқан маңызды қадам екенін айтты.

Жаңа нысан Дамбы балалар-жасөспірімдер спорт мектебінің қарамағына берілді. Жалпы аумағы 2,02 гектарды құрайтын кешеннің ғимараты 1274 шаршы метрді қамтиды. Құрылысы 2024 жылдың қаңтар айында басталған болатын. Мұнда волейбол, баскетбол, футбол, еркін күрес, бокс және дзюдо сияқты онға жуық спорт секциясы жұмыс істейтін болады. 500-ге жуық бала мен жасөспірім жаттығуға мүмкіндік алады. Сондай-ақ, 160 орындық көрермендер залы қарастырылған. Ғимараттан бөлек, ауласына футбол алаңы, жүгіру жолы, ұзындыққа секіру алаңы, волейбол және баскетбол алаңдары, ашық ауадағы жаттығу аймағы салынған. Бұл ауыл тұрғындарына жаз мезгілінде спортпен шұғылдануға қосымша жағдай жасайды.

Қазір Атырау облысында спорт саласын дамытуға айрықша көңіл бөлінуде. Жастарды бұқаралық спортқа тарту үшін жаңа спорттық нысандар бой көтеріп, спорт клубтарының саны артып келеді. Бүгінде аймақта 30-дан астам спорттық ғимараттың құрылысы жүргізілуде. Дамбы ауылдық округінде ғана бұл – үшінші спорт кешені.

Жаңаталап ауылындағы тұрғындар да қуаныштарымен бөлісті. «Бұрын балаларымызды көрші ауылдарға қоғамдық көлікпен жіберуге тура келетін, ал ата-аналар қатты уайымдайтын. Жаңа спорт кешені жергілікті спортшыларға үлкен мүмкіндік береді», – дейді ауыл тұрғыны Әділет Баймұханов.

Айта кету керек, спорт кешені заманауи талаптарға сай салынған. Ол мүмкіндігі шектеулі азаматтарға да толық қолжетімді. Ғимарат қажетті құрал-жабдықтармен және арнайы бөлмелермен жабдықталған.