Атырауда дәстүрлі «Мейірім жәрмеңкесі» өтті

Атырау қаласындағы Достық үйінде Атырау облыстық Қазақстан халқы Ассамблеясының «Довира» украин этномәдени бірлестігінің ұйымдастыруымен дәстүрлі «Мейірім жәрмеңкесі» өтті. Ізгілікке негізделген іс-шараға белгілі кәсіпкер, қоғам белсендісі Елена Жидкова қолдау білдіріп, серіктестік танытты.

Ұйымдастырушылардың айтуынша, қайырымдылық акциясы аясында көмекке мұқтаж жандарға 250 жұп әйелдер аяқкиімі таратылған.

– Бизнес өкілдері мұндай әлеуметтік шараларға белсенді атсалысуы қажет деп есептейміз. Бұл тек киім-кешек тарату емес, адамдарға мейірім мен үміт сыйлаудың шынайы көрінісі. Осындай акциялар өзгелерге де үлгі болып, игі істерге шабыт беретініне сенеміз, — дейді «Довира» этномәдени бірлестігінің төрағасы Виктория Синицына.

Айта кетейік, «Довира» этномәдени бірлестігі өңірдегі мәдени-көпшілік және қайырымдылық жұмыстарына белсенді қатысып келеді.

Ботагөз ИСАТАЙ,

Х.Досмұхамедов атындағы Атырау университеті «Филология» мамандығының IV курс студенті