«Ерік Мостовой» каналының мәселесі көтерілді

Серік Шәпкенов: «Ерік Мостовой» каналы өзіне жүктелген міндеттерді атқара алмай отыр.

Атырау облысының әкімі Серік Шәпкенов соңғы жылдары тұрғындар мен белсенділер жиі көтеріп жүрген мәселеге қатысты әлеуметтік желідегі парақшасында жазды.

Оның сөзінше, ұзындығы 15 шақырымға созылатын канал 2000 жылдардың басында салына бастаған. Алайда оның құрылысы әлі аяқталмады. Бұл канал топырақ астындағы суды құрғатып, жерасты су деңгейін төмендетіп, жауын-шашын кезінде қаланы су баспас үшін салынады деп жоспарланған.

Өңір басшысы каналға қатысты шешім қабылдамас бұрын, тұрғындар ұсыныс білдіре алатынын жазды. Ұсыныстарды akimat_atyrau@atyrau.gov.kz электронды поштаға жолдауға болады.

Еске салайық, бұған дейін мәселені жан-жақты талқылаған қала тұрғындары каналды құрғатып, оның орнына жаяу жүргіншілер мен велосипед жолақтары бар демалыс аймағын құру қажеттігін айтқан болатын.