Оқушылардың жеңісі – ұлттың абыройы

Президент Қасым-Жомарт Тоқаевтың халықаралық пән олимпиадалары жеңімпаздары мен жүлдегерлерін қабылдауы – елімізде білім мен ғылымға көрсетіліп отырған зор құрметтің айқын дәлелі. Бұл – тек дарынды оқушылар үшін ғана емес, бүкіл ұстаздар қауымы мен білім саласы өкілдеріне шабыт беретін маңызды оқиға.

Жас өрендердің халықаралық деңгейдегі сайыстарда алтын, күміс, қола медальдар иеленуі – олардың қажырлы еңбегінің, білімге деген талпынысының және ұстаздарының кәсіби шеберлігінің нәтижесі. Президентіміздің «әр жеңіс, әр медаль – тынымсыз ізденіспен, маңдай термен келеді» деген сөзі бізге – ұстаздарға да, шәкірттерге де үлкен жауапкершілік жүктейді.

Бүгінгі күні Қазақстанның білім саласында осындай жарқын жетістіктерге қол жеткізілуі – еліміздің болашағының берік іргетасы қаланып жатқанын көрсетеді. Ұлттық деңгейдегі олимпиадаларда ғана емес, халықаралық деңгейде де көк байрағымызды биіктен желбіретіп жүрген оқушыларымыз – нағыз ел мақтанышы.

Ұстаз ретінде Мемлекет басшысының білім беру ісіндегі мұғалімдердің рөлін ерекше атап өтуі біз үшін зор қолдау және рухани демеу болды. Бұл – болашаққа тың серпінмен, жаңаша көзқараспен қадам басуға жетелейтін қуатты мотивация.

Осы орайда, ел ертеңі – жастар екенін ұмытпай, оларды қолдауға, дамытуға, білімге жетелеуге барлық күшімізді салатынымызды жеткізгім келеді.

Зухра ТОҒАЙБАЙҚЫЗЫ,

Ә.Жангелдин орта мектебінің мұғалімі