Биыл Атырауда І сыныпқа баратын балалардың саны 9 мыңға жуықтауы мүмкін

2025-2026 оқу жылына бірінші сыныптарды мектепке қабылдау басталды. Бұл мерзім 1 сәуірден 31 тамызға дейін жалғаспақ. Ол туралы қалалық білім бөлімінің басшысы Айнагүл Дүйсекенова баспасөз мәслихатында баяндады, — деп хабарлайды Өңірлік коммуникациялар қызметі.

Қазақстан Республикасының заңнамасына сәйкес биыл бірінші сыныпқа алты жасқа толған немесе жыл соңына дейін толатын балалар қабылданады.

–Мектепке қабылдау емтихансыз жүзеге асырылады. Өтініштерді ата-аналар өз таңдауы бойынша egov.kz электронды үкімет порталы арқылы немесе оқу ордасында қағаз түрінде тапсыра алады. Өтініштер бір жұмыс күні ішінде қарастырылады. Өткен жылы сегіз мыңнан астам оқушы бірінші сыныпқа қабылданса, биыл 9 мыңға жуық оқушы қабылданады деп жоспарлап отырмыз, — деді А.Дүйсекенова.

Оқуға қабылдауға қажетті құжаттар тізіміне ата-ананың немесе заңды өкілінің өтініші, баланың туу туралы куәлігінің көшірмесі, 3×4 көлеміндегі фотосурет, медициналық анықтамалар, сонымен қатар «Бала денсаулығының паспорты» (052-у нысаны) және «Профилактикалық егу картасы» (№065/у нысаны) кіреді.

Бөлім басшысы құжат тапсыруды соңғы күндерге қалдырмай, алдын ала жинауға кеңес береді.