Байқаудың республикалық кезеңінде аудандық, қалалық және облыстық кезеңдердің қорытындысы бойынша 123 мұғалім «Үздік педагог – 2022» атағы үшін сынға түсіп, 64-і үздік педагог атанды.
Жеңімпаздар қатарында Атырау білім және инновация лицейінің геометрия, физика пәндерінің мұғалімдері Әділет Раисов, Аяз Мевлют, «APEC Petro Technic»жоғарғы колледжінің арнайы пәндер оқытушысы Айжамал Бағытова, Қатира Дүтбаева атындағы гуманитарлық колледжі арнайы пәндер оқытушысы Гүлзада Каментаева бар.
Айта кету керек, биыл байқаудың барлық кезеңін цифрландырудың нәтижесінде 5 мыңнан астам мұғалім қатысқан. Бұл өткен жылдармен салыстырғанда рекордтық көрсеткіш.
Салтанатты шарада оқу-ағарту министрі Асхат Аймағамбетов байқау жеңімпаздарын «Үздік педагог» атағымен құттықтап, өз ісіне адалдығы мен білім саласын дамытуға қосқан үлестері үшін алғысын білдірді.
