ЖЕҢІС ЖАҢҒЫРЫҒЫ

Кеңес әскерлерінің тегеурінді шабуылдарының нәтижесінде  Польшаның солтүстігіндегі Гдыня қаласынан Балтық теңізіне қарай тықсырылған фашистердің 2 армиясы талқандалды. Сөйтіп, жаудың Шығыс-Померан операциясының күлі көкке ұшты. Балтық теңізі жағалауына шыққан жауынгерлеріміз  Кольберг, Гдыня және  Данциг қалаларын жаудан тазартты.

1-Белоруссия майданының күшімен Германияның «Висла» армиясы тобының талқандалуымен жаудың қайта шабуыл жасау қабілеті жойылды.

Бұл күні 2-ші Украин майданының жауынгерлері Братислав-Бряновск операциясы барысында жойқын шабуылдарын үдете отырып,  Братислава қаласын жаудан азат етті. Словакия астанасы үшін болған ұрыстарға  Дунай әскери флотилиясының матростары да  қосылып, 23-гвардиялық атқыштар корпусы Дунайдың сол жақ жағалауына шықты. 4 сәуір күні майдан жауынгерлері Австрия-Чехословакия елдері шекарасына жетті.

Вена операциясы барысында кеңес жауынгерлері Морава-Брук өзендер сағасына шықты.  

Совинформбюроның сол күні таратқан хабарына қарағанда, 4-ші Украин майданының жауынгерлері Новы Тарг қаласының оңтүстік-батыс жағында чехословак әскерлерімен ұрыс қимылдарын жүргізе отырып, 60-тан астам елді мекенді жаудан тазартты.

2-ші Украин майданы әскерлері Словакияның маңызды өнеркәсіптік орталығы Братислава қаласына шабуыл ұйымдастырды. Осы уақытта майдан жауынгерлері кіші Карпат тауларынан өтіп,  Рарбок, Кухыня, Пернек атты елді мекендерін қолдарына алды.

 Дайындаған  Бақытжан ЖҰМАТ.