Atr.kz/23 қаңтар, 2020 жыл. Атырауда жатыр мойны қатерлі ісігінің алдын алуға бағытталған апталық өтуде.
20-27 қаңтар аралығында Атырау облыстық онкологиялық диспансерінде жатыр мойны қатерлі ісігінің алдын алу мақсатында апталық жүргізіледі, – деп хабарлайды Атырау өңірлік коммуникациялар қызметі.
Жатыр мойны қатерлі ісігі – дүниежүзі бойынша ең жиі кездесетін қауіпті дерттің бірі. Десе де, аталмыш ауруды ерте анықтау емделуге кепілдік береді. Бұл туралы ӨКҚ-де өткен брифингте облыстық онкодиспансері директорының міндетін атқарушы Эльмира Сапарова мәлімдеді.
– Жатыр мойны қатерлі ісігі – жатыр мойнында пайда болатын ауру емес. Оның дертке әкеліп соқтыратын өзіндік факторлары бар. Сондықтан, ұйымдастырылып отырған ашық есік күніне барлық әйел адамдар келіп, тексерістен өтсе дейміз, – дейді Эльмира Сапарова.
Бүгінде облыстық онкологиялық диспансерінде төрт мыңға жуық науқас есепте тұр. Соның ішінде жатыр мойны қатерлі ісігімен тіркелген әйелдер саны – 523.
Айта кетейік, апталық аясында әйел адамдар онко-гинеколог кеңесін жолдамасыз ала алады. Ал, жұмыс күндері апталыққа келе алмайтындар үшін 25 қаңтар күні ашық есік күні өтеді. Мұнда келушілерді мамандар сағат 09:00-13:00 аралығында қабылдайды.
