«Жадымда тұр жаңғырып…» кітабы жарыққа шықты

Ғабдол Сланов атындағы Атырау облыстық ғылыми-әмбебап кітапханасында Құрмет орденінің иегері, Атырау қаласының Құрметті азаматы, білім беру саласының ардагері Қадим Оңғарсыновқа арналған «Жадымда тұр жаңғырып…» атты естеліктер кітабының тұсаукесері өтті.

Бүгінде ұрпақтары әкенің есімін өшірмей кітап шығарып, қалың көпшілікке ұсынуда. Жиынға автордың ұрпақтары, туысқандары, ұстаздар мен өңірдің зиялы қауымы қатысты.

-Қадим Оңғарсынов елге аға, ақылшы бола білген азаматтарымыздың бірі еді. Қай кезде қоғамдық жұмыстарға белсене атсалысты. Тіпті, зейнетке шыққан шағында да облыстың ардагер ұстаздарының төрағасы болып еңбек етті. Әр жыл сайын ардагер ұстаздардың туған күніне құттықтауларды қолға алып жүрді. Кейбір ұстаздарға аудан, қала әкімшілігінен құттықтау ұйымдастырып, тіпті енді бірін наградаға ұсынып көптің алғысын алған жан. Кітабына өзімнің де пікірімді жазып, аталмыш дүниеге үлесімді қостым, — дейді Атырау облысының Құрметті азаматы Қатимолла Ризуанов.

Ұрпақтарының айтуынша, өзі тірі кезінде түрлі жағдайға байланысты кітапты жарыққа шығаруға мүмкіндік болмаған. Ал ендігі мақсат — өмір жолы мен қызмет саласындағы дара жолын халыққа естелікке қалдыру.

-Бойына біткен асыл қасиетінің арқасында халықтың баласын тәрбиелеуде үлкен еңбек етті. Мектепті тәмәмдап үлкен жолға түскен сәтте де бізге жол сілтеп, бағыт-бағдар берді. Ендігі уақытта өскелең ұрпаққа ағайдың кітаптарын оқытып, ол туралы жеткізіп айту міндетіміз, — деді шәкірті Жалғас Дүйсенғалиев.

Айта кету керек, биыл Қадим Оңғарсынұлының өмірден өткеніне 1 жыл толады.

Ұлболсын МАРСОВА

Суреттерді түсірген автор