Ватсапта тараған видеодағы медициналық қалдықтардың неге өртелгені белгілі болды (+ФОТО)

Atr.kz/10 қазан, 2020 жыл. Биыл 23 қыркүйекте Атырау қаласының «Спецавтобаза» ЖШС-нің полигоны маңында әлдебіршұңқырдың ішінде медициналық қалдықтардың өртеніп жатқаны туралы бейнетаспа «WhatsApp» әлеуметтік желісінде тарап кеткен болатын.

Анықталғанындай, медициналық қалдықтарды өртеп жатқан «AG Disinfection services» ЖШС-гі екендігі белгілі болды.

Сонымен қатар, Атырау облысы бойынша экология департаментінің «Адалдық Алаңы» жобалық кеңсесіне Атырау қаласының тұрғынынан жоғарыда көрсетілген оқиға бойынша мән-жайды анықтау жөнінде өтініш келіп түскен.

Соның негізінде, Департамент жоғарыда көрсетілген іс-әрекеттерде қылмыстың құрамы болуы мүмкіндігін ескере отырып, Атырау облысының Полиция департаментіне «AG Disinfection services» ЖШС-не қатысты Қазақстан Республикасының Қылмыстық кодексіне сәйкес процессуалды шешім қабылдау үшін тиісті құжаттарды жолдады.

Атырау облысы полиция департаментінен алынған ақпаратқа сәйкес, бүгінгі таңда Атырау қалалық полиция басқармасымен «AG Desinfection Services» ЖШС-не қатысты қылмыстық іс көтеріліп, сотқа дейінгі тергеп-тексеру шаралары басталды.

Бүгінде әлеуметтік желілерге мониторинг жүргізу барысында, аталған орында «AG Desinfection Services» ЖШС-мен медициналық қалдықтарды өртеу жұмыстарының жалғасып жатқандығы анықталды.

Оқиға орнын Департаменттің мамандарымен зерделеу барысында анықталғанындай, қалдықтар арнайы қондырғыда өртелген.
Сондай-ақ, аталған жерге Полицияның жедел-тергеу тобы келіп, тиісті іс шараларды жүргізді.

Аслан Жеңісұлы,

Атырау облысы бойынша экология департаментінің ресми өкілі