«U:hack Atyrau» инновациялық идеялар фестивалі алғаш рет – Атырауда! (+ФОТО)
Atr.kz/16 шілде, 2019 жыл. Технология таңдай қақтырып, кәсіпкерлік кең қанат жайған бұл ғасырда бір ғана мамандықпен шектеліп қалуға болмайды. Әсіресе, биылғы Жастар жылында мемлекет ұсынған мүмкіндікті молынан пайдаланып, бизнес бағдарламаларына үздіксіз қатысу қажет.
Махамбет атындағы академиялық қазақ драма театрында өткен инновациялық идеялар фестивалінің басты мақсаты – осы. Жалпы, «U:projects» қоғамдық бірлестігінің президенті Тоқтар Әлімбековтың айтуынша, мұндай заманауи форматтағы шара бұрынсоңды Атырауда өтпеген. Қатысушылар ІТ, контентмедиа, кино-видео және кәсіпкерлік сияқты төрт секцияға бөлінді.
Фестивальдің ашылу салтанатымен жастарды облыс әкімінің орынбасары Әлібек Нәутиев құттықтады.
– Еліміз бүгінде сандық технология мен инновациялық дамуға қарқынды қадам басты. Бұл игі үрдісті өздеріңіздей жалынды жастар жалғап келеді. Сөзіміздің бірденбір айғағы – осы байқау. Атыраудағы «Теңіз» кен орнында елу мыңға тарта жұмысшы ауысыммен еңбек етсе, бәрі де – жаңа технология мен заманауи жүйені меңгерген білікті мамандар. Соңғы жылдары жастар саясаты бағытында бөлінген қаражат көлемі бес есеге өсті. Ал, «Жас отау» бағдарламасымен 300-ден астам жанұя баспаналы болды-, деді облыс әкімінің орынбасары Әлібек Нәутиев.
Бұл байқауда небір батыл бастамаларды жүзеге асыруға ниетті әр өңірден келген 500-ден астам жас бақ сынады. Олардың арасынан ең креативті идеялар қазылардың жоғары бағасын иеленді.
– Екі күндік фестивальді « Ж а с т а р д ы қ о л д а у орталығы» ұйымдастырып отыр. Жаңа жоба форматын «Yahoo» компаниясы 2005 жылы қызметкерлердің шығармашылық идеяларын іске асыру мақсатында әзірлеген болатын. Кейін дәстүрге айналды. Енді міне, Атырауда да өткізілуде, — дейді байқауға қолдау білдірген облыстық жастар саясаты мәселелері басқармасының басшысы Роллан Құспан.
Сондай-ақ, Мұрат Жүсіпов, Мирус Құрмашев, Айболат Көлетай, Саясат Нұрбек, Айбек Рахым, Қанат Әуесбай, Арман Жүсіпов, Әсел Налыбекова, Бекзат Төлепов, Ақсұлтан Қалиев, Жансерік Қадырбаев және басқа да есімі елге белгілі бір топ азамат өз тәжірибесімен бөлісті.
Амандық САҒЫНТАЙҰЛЫ
