Тұлғасы тұнған тәлім, есімі елге мәлім

Бауыржан Момышұлы — ұлт тарихында алдымен дарынды әскери ойшыл, тағылымды тәрбиеші, қалам қарымы тек шындыққа сүйенген жазушы тұлға. Батыр ерлігін, өшпес есімін жас ұрпаққа насихаттау мақсатында облыстық дарынды балаларға арналған ұлттық гимназияда «Тұлғасы тұнған тәлім, есімі елге мәлім» тақырыбында тәрбиелік шара өтті.

Тағылымды шараның шымылдығы “Сахна” драма үйірмесінің тұлғаның өмір жолына арналған қойылымымен түрілді. Алғашқы сөз алған ұлттық гимназияның директоры Шынаргүл Имашова қаһарман ердің саналы ғұмырынан сыр шертіп, азаматтық болмысының асқақтығына кеңінен тоқталды.
Шараға арнайы қонақ ретінде “Елсана” руханият-патриоттық қауымдастығының құрушылары және ұйымдастырушылары, сондай-ақ Көкжал» батырлар алаңының жетекшісі, Қазақстан Республикасының Қарулы күштер ардагері, запастағы майор Орах Әбуұлы және көмекшісі Талғат Айтқалиев қатысты. Бауыржан Момышұлының көзін көрген Орах Әбуұлы батырмен кездескен сәттерін есіне алып, әсерлі естеліктерімен бөлісті.

Одан әрі сөз кезегін “Елсана” руханият-патриоттық қауымдастығының президенті Нұрберген Дәулетов жалғады.
Батыр бабаларымыздың өлшеусіз еңбегінің арқасында келген азаттықтың ұландары сахнаға көтеріліп, өз өнерлерін ортаға салды. Шара соңында көнекөз ақсақал барша жиынға қатысушы қонақтар мен көрермендерге ақ батасын жаудырды.

Еркеназ ҚАЛИЖАН