«Тілсіз жаудың» құрбаны

  Атырау облысы Төтенше жағдайлар департаментінің бастығы Сағынбек Өмірзақовтың айтуынша, жыл басынан бері 12 адам суға кеткен. Оның 4-уі бала. «Бүгінде Атырау облысында суға кетушілердің саны күрт өсіп барады. Оның алдын алу үшін қазір тегеурінді шаралар жасақталуда» дейді құрылым жетекшісі. Жазғы мезгілде оқыс оқиғалардың қаупі өсе түсті. Оған тұрғындардың «жабайы» жағалауларға жиі келетіндігі себепші болып отыр. Сонымен қатар, ішімдік ішіп, суға түсетіндер де азаймауда. Сондықтан, құтқарушылар көлденең жағдайлардың алдын алу үшін жергілікті полицейлермен бірге рейдтік шараларды жүйелі өткізуде.