Сәулет өнеріне сіңген саналы ғұмыр
Қазақстан Республикасы Конституциясының 30 жылдығына орай Атырау қаласында өткен салтанатты іс-шарада мен ІІІ дәрежелі “Еңбек даңқы” орденімен марапатталдым. Бұл – жылдар бойы қаланың, облыстың құрылыс саласына сіңірген еңбегімнің жемісі деп білемін.
Өмір жолымда 62 жыл еңбек етсем, соның 35 жылын сәулет (архитектура) саласына арнадым. Еңбекке ерте араластым – небары 17 жасымда Мақат кентіндегі жылу жүйесінде слесарь болып жұмыс істедім. Кейін Венгрияда әскери борышымды өтеп келіп, темір жол саласында еңбек еттім.
Бала кезімнен сурет салуға бейім болдым. Сол өнерге сүйене отырып, Алматыдағы Қазақ политехникалық институтының архитектура факультетіне оқуға түсіп, білім алдым. 1975 жылы «Қаззаводпроект» Ақтөбе институтының Атыраудағы филиалы ашылып, сол жерге архитектор болып жұмысқа тұрдым. Бұл мекемеде 10 жыл бойы табанды еңбек еттім. Әр жылдары лауазымдық сатылармен өсіп, 1985 жылы Гурьев (қазіргі Атырау) қаласының бас архитекторы, ал 1989 жылы облыстың бас архитекторы қызметіне тағайындалдым.
2001 жылға дейін облыстың 5 әкіммен қатар еңбек еттім. Кейін «Теңізшевройл» және NCOC компанияларында заңды қорғау бөлімінде жұмысымды жалғастырдым. Жалпы 78 жасқа дейін еңбек жолымды тоқтатпадым.
Мен үшін архитектор болу – үлкен жауапкершілік. Қала мен облыстың құрылысы, ғимараттар мен жолдардың, жалпы инфрақұрылымның сапасы – архитектордың кәсіби білігіне тікелей байланысты. Әрбір нысанның орнын дұрыс таңдап, жобасын сапалы дайындау үшін үздіксіз ізденіс пен білім қажет. Мен бұл жолда өз ісімді адал атқардым деп есептеймін.
Ал бүгін маңдай терімнің еленіп, мереке қарсаңында осындай мемлекеттік марапатқа ие болуым – үлкен қуаныш. Бұл марапатты тек өзімнің еңбегімнің жемісі емес, кейінгі жас буынға үлгі болсын деген ниетпен қабылдадым.
Ата Заңымыз – әр азаматтың құқығы мен мүддесін қорғайтын басты құжат. Ол халықты әділдік пен тұрақтылыққа бастайды. Конституцияға адал қызмет етіп, ел дамуына үлес қосу – әр қазақстандықтың міндеті.
Еліміз аман, жұртымыз тыныш болсын! Өңіріміз өркендеп, қалаларымыздың келбеті келісті болғай!
Ізімберген САНАБАЕВ,
Қазақстанның еңбек сіңірген сәулетшісі
