«Қозғалыс – бұл өмір!»: Атырауда велошеру өтеді

Облыстық денсаулық сақтау басқармасының ұйымдастыруымен 8 маусым күні медицина қызметкерлері күніне орай «Қозғалыс – бұл өмір» атты велошеру өтеді. Бұл іс-шара салауатты өмір салтын насихаттауға және медицина саласының өкілдеріне құрмет көрсетуге бағытталған.

Жоспар бойынша велошеруге шамамен 200 адам қатысады. Қатысушылар таңертеңгі сағат 08:30-да жиналып, 09:00-де шеруді бастап, белгіленген бағыт бойынша қозғалады.

Велошеру Сұлтан Бейбарыс даңғылы бойындағы «ҚазМұнайГаз» жанармай құю бекетінен басталып, облыстық инфекциялық ауруханасына дейін жалғасады.

Іс-шараға қатысушылар үшін ақ жейде, қара шалбар немесе қысқа шалбар, ақ бейсболка секілді бірыңғай киім үлгісі белгіленген.

Ұйымдастырушылардың айтуынша, бұл велошеру – денсаулық сақтаудың басты шарты тек емдеу емес, алдын алу, салауатты өмір салтын қалыптастыру екенін қоғамға көрсетудің бір жолы.

Алтыншаш ҚҰРМАШЕВА