ӨНЕГЕЛІ ӨМІРДІҢ ЖАРҚЫН КӨРІНІСІ

Елбасының өзінің бүкіл еңбегінде айтылатын естелік, ойлары шындық аясында тартымды түсірілген. Президенттің оқуды бітірген сәтінен бастап Теміртауға келген көрінісі, оның қат-қабат өміріне тез араласып кеткендігі өзгелердің өмірге деген құлшынысын арттырғандай әсерде қалдық.

Мен Елбасымен Алматы, Астана, Атырау, Теміртау қалаларында талай рет кездестім. Әсіресе, Теміртауда жиі боламын. Ол жер Елбасының жан-жүрегіне өте ыстық. Президенттің өмір белесіне қадамы осы жерде басталды. Қазір бұл қалада оның  достары  көп. Олармен кездесе қалғанда Елбасы туралы айтатын қызықты  естеліктері де мол.

Осыдан он екі жыл бұрын Теміртауда болғанымда, замандастардың әңгімесі негізінде Нұрсұлтан Назарбаевтың  сол кездегі қызметі, жастық өмірі, Теміртау төңірегіндегі Самарқан көлінде қызықты кештерді өткізуі, қыз-жігіттермен билеуі, ән салуы, барлық қасиеттерін бейнелеп, «Теміртау түбі» деген әнімді жаздым. Бұл ән бүгінгі күні Елбасының сүйікті әніне айналды. Ол болған жерде осы ән міндетті түрде орындалады. 1970 жылдары Теміртау қаласында үлкен салтанатты жиын өтіп, оған шетелдік қонақтар және металлургтер қатысты. Осы үлкен жиында «Теміртаудың мақпал түні» деген кітабымның тұсаукесері көрсетіліп, Елбасымен тағы да жүздестік. Бүгінгі фильм барысында сол Теміртаудың 1950-1960 жылдардағы бүкіл тынысы өте әсерлі түсірілген. Президенттің өнегелі, жарқын, рухани бай өмірін тамашалаған  халық ыстық   ықыласқа бөленді деп ойлаймын.

Фильм Атырау облысы әкімі Бақтықожа Ізмұхамбетовтің тікелей басшылығымен қала тұрғындарына ғана емес, облыстың зиялы жұртшылығына ұсынылды. Осы жерде өз басым Бақтықожа ініміздің де Елбасының сындарлы саясатын шебер жүзеге асырып жатқандығын атап айтар едім. Мұның өзі елдің Президентке деген сенімін арттыра түскендей. Біз – осындай Көшбасшысы бар бақытты елміз.

Илья ЖАҚАНОВ,

композитор,

Қазақстан мен Қырғызстанның еңбек сіңірген қайраткері.