Өртенген ғимараттың тағдыры не болады?
Қаладағы «Шалқыма» сауда үйінің маңында орналасқан «Атырау мұнай және газ технологиялық колледжінің» ғимараты 2018 жылы өрт салдарынан пайдалануға жарамсыз болып қалған.
«Былина» орыс этномәдени бірлестігінің төрағасы Андрей Кораблёв әлеуметтік желіде қала орталығындағы қараусыз қалған бос ғимараттың «елес үйге» айналғанын айтады.
– Онда қазіргі таңда жергілікті әлеуметтік жауапкершілігі төмен бұзақылар ғана торып жүреді. Өрт кезінде апатты жағдайда болған ғимарат 1949 жылы салынған. Оның орнына «Бином» мектебін немесе шағынауданда жетіспейтін балабақша салуға болады. Жерінің аумағы үлкен, көлікке де қолжетімді, — дейді бірлестік төрағасы.
Расында да қаланың сәнін алып тұрған бос ғимаратты қала мен қала тұрғындары үшін тиімді іске асырса жақсы болар еді.
Алмас БАУЫРЖАНҰЛЫ
