Мақат ауданы: Бастауыш мектептің биік белесі
Астана қаласында Қазақстан Республикасы Оқу-ағарту министрлігі ұйымдастырған «Ауыл мектебі – сапа алаңы» атты іс-шарада Мақат ауданындағы №2 бастауыш мектебі «Тиімді ауыл мектебі» номинациясына ие болды. Сондай-ақ салтанатты жиында осы мектептің директоры Руслан Баймұқашев «Іскер менеджер» номинациясын иеленіп, зор құрметке ие болды.
Республикалық деңгейдегі ауқымды іс-шараға қатысқан Оқу-ағарту министрі Ғани Бейсембаев марапат иелерін құттықтап, алдағы жұмыстарына табыс тіледі.
Мектеп директоры Руслан Теміржанұлының сөзінше, бұл марапат ұжым үшін зор құрмет, үлкен мәртебе, қажырлы қызметтің лайықты бағасы.
Атырау облысындағы 200-ден астам білім беру мекемесінің ішінен үздіктердің үздігі атанған №2 бастауыш мектебінің ұжымы мен оқушыларын шын жүректен құттықтаймыз!
Алмас ҚАБДОЛОВ
