Бірлескен іс берекелі

Кеше облыс әкімі Нұрлан Ноғаев Нидерланд Корольдігінің Қазақстан, Қырғызстан және Тәжікстан Республикаларындағы төтенше және өкілетті елшісі Дирк Ян Копты қабылдады.

Аймақ басшысы кездесу барысында елшіні жаңа лауазымға тағайындалуымен құттықтады. Айта кетсек, Дирк Ян Коп ағымдағы жылдың 1-тамызынан бастап еліміздегі елші қызметін атқаруда.

— Сізге жүктелген елшілік міндеттер Нидерланд Корольдігі мен Қазақстан Республикасы арасындағы әлеуметтік-экономикалық, сауда-саттық қарым-қатынастарды одан әрі жақсарта түседі деген сенімдеміз, — деді аймақ басшысы Нұрлан Асқарұлы.

Қазіргі таңда екі елдің қатысуымен Атырау облысында сексеннен астам біріккен кәсіпорын жұмыс жасауда. Кедендік статистиканың мәліметінше, ағымдағы жылдың қаңтар-қыркүйек айларында Атырау облысы мен Нидерланд Корольдігінің ішкі сауда айналымы 1,5 миллиард долларды құрады. Атап айтсақ, 1,4 миллард долларды құрайтын өнім экспортталса, ал, импорт көлемі өткен жылдың сәйкес кезеңімен салыс-тырғанда екі есе артып отыр (0,03 миллиард доллар — ред.).

Нидерландта ауыл шаруашылығы маңызды, әрі жоғары қарқынды сала болып саналады. Ел аумағының 56 пайызы – ауыл шаруашылығы жерлері. Өнімнің сексен пайыздан астамы Еуродаққа мүше елдерге экспортталады.

Елшінің айтуынша, Нидерландтың Қазақстанға да коммерциялық қызығушылығы басым. Соның ішінде Алматы және Атырау өңірлерімен жан-жақты байланыс орнатуды көздеп отыр.

— Қазақстанның әлемдік қауымдастықта алар орнын жақсы білеміз.  Сапарым барысында осы өңірде қызмет жасайтын  голландиялық компаниялар өкілдерімен де кездестім. Байқағаным, Атырауда 15-20 жылдан бері қызмет етіп келе жатқан голландиялық компаниялар бар екен. Олар жергілікті атқарушы орган тарапынан қолдауды сезініп, жұмыс жасауға үлкен мүмкіндіктер бар екенін айтты, — деп, елші ризашылық сезімін білдірді.

Өңір басшысы Нұрлан Ноғаев Елбасы инвесторларды тартуды, оларға барлық  жағдай жасауды тапсырғандығын жеткізді.

— Бұл бағытта нақты тапсырмалар мен алда тұрған міндеттер бар. Бірлескен істің берекесі болады. Сондықтан, қолдау білдіруге дайынбыз. Инвесторларға да өз тараптарымыздан жергі-лікті халықты жұмыспен қамтуға, өңірге заманауи технологияларды тартуға  бағытталған үлкен жауапкершілік жүктеп отырмыз, — деді облыс әкімі Нұрлан Ноғаев.

Айгүл Ертілеу