Құтқарушылардың кәсіби мерекесіне орай І дәрежелі «Айбын» орденінің иегері — Асқар Забикулинді еске алуға арналған өрт сөндіру бөлімдері арасында функционалды өрттік көпсайыстан (өрт сөндіру кроссфиті) облыстық чемпионат өтті, — деп хабарлайдыatr.kzтілшісі.
Өрт сөндіру кроссфиті – бұл шыдамдылық пен күшке арналған, негізінде аэробты, гимнастикалық және ауыр атлетика жаттығуларынан тұратын бағдарлама. Облыс және аудан көлемінде бұл жарыстың түрі әрбір жыл сайын өтіп жеке құрам арасында өрт сөндіру кроссфитіне деген қызығушылық өсіп келеді.
Облыстық чемпионатқа қаладан, аудандардан жасақталған мықты командалар қатысты. Байқау бағдарламасы күрделілігімен және әр түрлілігімен ерекшеленді. Қатысушылар 9 күштік жаттығуларын, соның ішінде жауынгерлік киімді кию, салмағы 36 кг болатын гірді бастан жоғары көтеру, жүгіру, дөңгелектерді бұрыштай итеру, өрт сөндіру жеңдерін жаю, тіпті жеңіл автокөліктің автошинасын зілбалға көмегімен 10 метрге соғып ығыстыру және автокөлікті сүйреу кезеңдерінен өтті.
Чемпионат қорытындысында Қызылқоға ауданының №12 ӨСБ командасы I орынға ие болды. II орынды Атырау қаласы №4 ӨСБ командасы, III орынды Индер ауданы №5 ӨСБ командасы иеленді. Чемпионат жеңімпаздарына кубоктар, грамоталар, медальдар табыс етілді.
Жеке есепте ең жылдам, әрі төзімді болып №12 ӨСБ өрт сөндіруші-құтқарушысы азаматтық қорғау кіші сержанты Аманқос Азамат Абатұлы (3,04 минут) танылды.
Айта кетейік, өрт сөндіру мен авариялық-құтқару жұмыстарын жүргізу бұл үлкен физикалық дайындықты және шыдамдылықты талап ететін мамандықтардын бірі.
