«Қайдасың, бұрынғының бұрымдысы?» байқауының бірінші қатысушысы

Мен 1997 жылы 25 тамызда Атырау қаласында дүниеге келдім. 2003-2014 жылдары аралығында қалалық Ы.Алтынсарин атындағы №11 орта мектепте оқыдым. 2014-2018 жылдары аралығында Х.Досмұхамедов атындағы Атырау мемлекеттік университетінен Қазақ тілі мен әдебиеті пәндерінің мұғалімі мамандығын алып шықтым. Қазіргі таңда аталған мамандық бойынша өзім тәрбие алған Ы.Алтынсарин атындағы мектепте шәкірттерге білім беріп, ұлағатты  ұстаздармен ұжымдас болып келемін.

Шашымды бала күнімнен бастап өсіріп келіп, 2009 жылы  6-сыныпта қиып тастағаным және кейін, бұл қылығыммен әкемді қатты ренжітіп алғаным әлі есімде. Себебі, әкем маған үнемі қазақи тәрбие беріп, сыпайылық әдебін үйретіп келеді. Осыдан бері шашымды қайта өсіріп, күтініп келемін. Қазір бұрымымның ұзындығы – 125 см. Шашымды дұрыс күту құпиясымен бөліссем, бұрымымды аптасына екі рет химиялық қоспасы жоқ, ошаған сығындысымен дайындалған, дәрілік су сабынмен жуамын. Айына бір рет шаштың құрғақтығын жойып, жылтырауын, жұмсақтығын, жиі түспеуін және беріктігін сақтау үшін айранды қолданып жүрмін. Шаш кептіргіш пен шаш өсіретін түрлі химиялық су сабындарды мүлдем қолданбаймын. Бұрымымды тіл-көзден сақтау мақсатында көбіне шашбау тағып жүремін.

Сондай-ақ, қазақтың ұлттық нақыштағы киімдерін киіп, зергерлік бұйымдарын таққанды да ұнатамын. Сондықтан болар, ең сүйікті мейрамым – «Ұлыстың ұлы күні – Наурыз» мерекесі. Біздің ата-бабаларымыздан қалған көне салт-дәстүрлерді жаңғырту – барлық қазақ қыздарына парыз. Өйткені, бұл салт-дәстүрлерде ұлттық тәлім-тәрбие мен рухани жаңғыру жатыр. Осы дәстүрді қадірлеуге, бұрым өсіруге барша қазақ қыздарын шақырамын.

Назеркем ӘБІЛХАМИТОВА,

мұғалім.

Атырау қаласы.