Атыраулық студенттер аңыз адаммен кездесті

UTEBAYEV UNIVERSITY-де «Тұлға және тағылым» жобасы аясында Қазақстанның Еңбек Ері, халық әртісі, көрнекті театр және кино қайраткері, сахна аңызы Асанәлі Әшімовпен кездесу өтті.

Атырауға сапары барысында жастармен жүздесуге келген Асанәлі Әшімұлы мен жұбайы Бағдат Әшімованы университет ұжымы зор ілтипатпен қарсы алды.

Жоғары оқу орнының Басқарма төрағасы-ректоры Гүлзада Шакуликова:
— Университетіміздің басты мақсаты – жастарды білімді, мәдениетті, ұлттық құндылықтарды бойына сіңірген азамат етіп тәрбиелеу. Бүгінгі студенттер – ертеңгі елдің тірегі. Олардың санасына өзіңіздей ардақты тұлғалардың өнегесі, өмірлік ұстанымы ерекше ықпал етеді. Театр мен кино өнеріндегі әр рөлі тарих, әр бейнесі тағылым болған қайраткермен кездесудің жастарға берері мол, — деп атап өтті.

Кеш шымылдығы университеттің домбырашылар ансамблінің орындауындағы күймен ашылып, ұлттық өнердің әуені залға ерекше рух сыйлады. Арнайы дайындалған бейнематериалдан Асанәлі Әшімұлының театр мен кино өнеріндегі жарқын бейнелері көрсетілді.

Кездесудің ең әсерлі сәттерінің бірі – «Ашық микрофон» болды. Студенттер аңыз тұлғаға өздерін қызықтырған сауалдарын қойып, еркін пікір алмасты.

Өнер тарланы өмір жолындағы қызықты сәттерімен, естеліктерімен бөлісті. Ол өнерге адалдық, еңбектің қадірі және ұлт руханиятының тұтастығы туралы тағылымды ой қозғап, жастарды білімге, тәрбиеге, ізгілікке шақырды.