Атырауда жасөспірімдер арасында Құран жарысы өтті

ҚАЗАҚСТАН МҰСЫЛМАНДАРЫ ДІНИ БАСҚАРМАСЫ АТЫРАУ ОБЛЫСТЫҚ ӨКІЛДІГІНЕ ҚАРАСТЫ «АНАШЫМ» МЕШІТІНІҢ АШЫЛҒАНЫНА БІР ЖЫЛ ТОЛУЫНА ОРАЙ ОБЛЫСТЫҚ ҚҰРАН ЖАРЫСЫ ӨТТІ.

– Бұл шараның маңыздылығы ерекше. Осы уақыт ішінде мешітімізде қайырымдылық, ағартушылық бағытында ауқымды шаралар ұйымдастырылды. Бүгінгі Құран жарысының мақсаты – рухани қуатты қоғам құруға атсалысу. Білімді де ізгілікті жастардың қатары көбейсін, — деді «Анашым» мешітінің имамы Айдын Серікбаев.

Жарыс үш аталым бойынша анықталды. 7 жасқа дейінгі балалар арасында «Фил», «Нəс» сүрелерін, 7 мен 15 жас аралығындағы жасөспірімдер арасында «Духа», «Нəс» сүрелерін жəне 15 жастан жоғары қатысушылар арасында 30-шы параны жатқа айту бойынша бəсеке тартысты өтіп, 80-ге жуық қатысушы жарыс көркін қыздырды.

Құран сайысына облысымызға белгілі қари – ұстаздар қазылық етті. Жарыс қорытындысында 7 жасқа дейінгі балалар арасында ең жас қатысушы Мұсабек Санжарбекұлы I орынды иеленді. 7-15 жас аралығындағы жасөспірімдер арасында Арман Серіков жеңімпаз атанса, 15 жастан жоғары қатысушылар арасында Ахмет Олжасұлы үздік көрінді. Жеңімпаздардың барлығына дипломдар мен қаржылай сертификаттар табысталды.

Өз тілшіміз