Атырауда «Дина» базары отқа оранды… (ВИДЕО)

Бүгін түнде әлеуметтік желіде Атырау қаласындағы «Дина» базары отқа оранып жатқан сәті түскен әуесқой видеолар тараған болатын…

Бейнежазбадан сауда орталығынан қызыл жалын лапылдап жанып жатқанын анық көруге болады.

Анықталғандай, Атырауда түнде базар өртеніп, оны сөндіруге 150-ден аса адам жұмылды, — деп хабарлайды Tengrinews.kz тілшісі ТЖМ баспасөз қызметіне сілтеме жасап.

ТЖМ ресми өкілі Талғат Уәлидің хабарлауынша, 19 желтоқсанда сағат 01.41-де Атырауда «Дина» сауда базарының аумағында жалпы ауданы 3 420 шаршы метр өрт шыққан.

«Өрт сағат 04.25-те сөндірілді. Қаза тапқандар мен зарап шеккендер жоқ. Өрттің шығу себептері анықталып жатыр. Өртті сөндіруге ТЖ департаменті (63 қызметкер, 11 дана техника), «Өрт сөндіруші» АҚ (3 қызметкер, 1 бірлік техника), Полиция департаменті (50 қызметкер, 20 бірлік техника), 5546 әскери бөлімі (52 әскери қызметкер, 3 бірлік техника) жұмылды», — делінген хабарламада.

ТЖМ азаматтарды өрт қауіпсіздігі қағидаларын сақтауға шақырады.