Атырауда алғаш рет пазл құраудан сайыс өтті

Халықаралық Жастар күніне орай «Atyrau Puzzle Day» пазл құрастыру сайысы өтті. Атырауда алғаш рет ұйымдастырылған сайыс «Atyrau Jastar Fest — 2024» аясында қолға алынды.

Облыстық ішкі саясат басқармасының басшысы Гүлнұр Сүйеуованың сөзінше, жарыстың мақсаты — жастар арасындағы командалық белсенділікті, тез шешім қабылдауды, зияткерлік деңгейін арттыру.

Төзімділік пен қырағылықты, шапшаңдық пен зеректікті талап ететін пазл жинау сайысына Атырау қаласынан 5 адамнан құралған жалпы саны 32 команда қатысты. 14-35 жастағы 160 қатысушы бір алаңда бас қосып, бірдей уақытта пазл жинауды бастады.

3 сағат 26 минутта пазлды құраған «Ravensburger» командасы І орынды жеңіп алып, 100 мың теңге иеленді.
«Уақыт жоқ» командасы ІІ орын алып, 50 мың теңге еншілесе, III орынмен «KUS қырандары» командасы табан тіреп, 25 мың теңгеге ие болды.

Жайна МӘЛІМҚОЖА