Атырауда 109 бірыңғай байланыс орталығы 2 млн-ға жуық өтінішті қабылдады
Атырау облысы әкімінің 2020 жылғы 7 қыркүйектегі өкімімен іске қосылған 109 бірыңғай байланыс орталығы өңір тұрғындары мен қонақтарының коммуналдық қызметтер, әкімдіктер және басқармаларға қатысты өтініштерін қабылдап, өңдеуді және кері байланыс орнатуды жүзеге асырады. Колл-орталық тәулік бойы 12 сағаттан 4 ауысымда жұмыс істейді, — деп хабарлайды Өңірлік коммуникациялар қызметі.
Атырау облысы әкімдігінің 109 бірыңғай байланыс орталығы басшысы Ақмарал Батырханованың айтуынша, бүгінде мұнда 40 маман бар.
-Облыстың кез келген аумағынан 109 нөмерін теру арқылы тегін қоңырау шалатын мүмкіндік бар. Өтініштер түрлі коммуникация құралдары арқылы қабылданады: қысқа 1-0-9 нөмірі, Telegram-бот, KOMEK109 мобильді қосымшасы, сайт және әлеуметтік желілер бар. Іске қосылғалы бері 2 миллионға жуық шағым қабылданды. Былтыр 232 мың, ал 2025 жылдың ақпан айына дейін 50 мыңға жуық шағым қабылданды. Біздің мақсатымыз — алғашқы қоңырау түскен бойда жауап беру,- деді ол.
Өтініштер регламент бойынша 1-3 күн ішінде орындалады, ал күрделі мәселелерге 15 күнге дейінгі уақыт кетпек. Орталық өңделген өтінімдер бойынша тұрғындармен кері байланыс орнатады.
